Першая беларуская (не) канферэнцыя для настаўнікаў сабрала 80 педагогаў з усёй краіны

Мінскі хаб Global Shapers разам з Таварыствам беларускай школы зладзіў першую ў Беларусі сустрэчу педагогаў з мэтай іх прафесійнага развіцця ў фармаце Эдкэмп.

14 кастрычніка ў Мінску прайшоў незвычайны форум для школьных настаўнікаў. Непадобна да традыцыйных канферэнцый, дзе арганізатары складаюць праграму і ўдзельнікам не застаецца выбару, як прытрымлівацца яе, Эдкэмп (ад ангельскага EdCamp) дазваляе самім удзельнікам прапаноўваць і выбіраць тэмы. Такі фармат узаемадзеяння педагогаў з мэтай іх прафесійнага развіцця з’явіўся ў 2010 годзе і пашырыўся на некалькі дзясятках краін свету, але да нядаўняга часу абмінаў Беларусь.

Першы беларускі Эдкэмп сабраў амаль 80 беларускіх педагогаў з Пінска, Бешанковічаў, Магілёва, Слоніма, Віцебска і шмат якіх іншых беларускіз месцаў. Каля года мерапрыемства рыхтавалі Мінскі хаб Global Shapers і Таварыства беларускай школы, дзякуючы падтрымцы конкурсу сацыяльных праектаў Social Weekend і асабіста мецэната Юрыя Мельнічка, а таксама кампаніі Coca-Cola Beverages Belarus.

edcamp3
Удзельнікі пазначаюць на карце Беларусі, адкуль прыехалі

Канферэнцыі ў фармаце ЭдКэмп даюць адчуванне свабоды педагогам і дапамагаюць ім рыхтаваць дзяцей да сучасных патрабаванняў працадаўцаў, кажа ўдзельніца мерапрыемства Алена Качанава, намеснік дырэктара па вучэбнай працы школы №31 горада Віцебска.

Алена Качанава: “Такія сустрэчы – як паветра ў наш час.Прыемна бачыць, колькі тут сабралася матываваных настаўнікаў, якія жывуць сваёй прафесіяй і рыхтуюць сапраўдных грамадзян. Бо калі педагог прыйдзе і суха выкладзе свой урок, то вучань збярэ свае рэчы і з’едзе туды, дзе робяць гэта больш эмацыйна. Такія сустрэчы даюць педагогам адчуванне свабоды і разуменне, што яны могуць не проста быць у рамках строгай праграмы, але нешта мяняць і лепш рыхтаваць дзяцей да патрабаванняў часу і запытаў працадаўцаў”.

edcamp2
Вітальная дыскусія з удзела мэнэджэраў па падборы персанала беларускіх кампаній

Менавіта гэтаму была прысвечана ўступная дыскусія Эдкэмпа, у якой узялі ўдзел кіраўнік аддзела маркетынгу Rabota.tut.by Алена Праскурына, дырэктар Агенства па развіцці персаналу “Свабодны выбар” Ксенія Барэйша і HR менеджэры па персанале IT-кампаніі Besk Караліна Кульбака і Ірына Жыжына.

Па словах Тамары Мацкевіч, намесьніцы кіраўніка ТБШ, фармат Эдкэмпа, які толькі-толькі прыйшоў у Беларусь, незвыклы для ўдзельнікаў, а ў некаторай ступені і для арганізатараў мерапрыемства.

Тамара Мацкевіч: “Але мы бачым, што настаўнікі добра да яго паставіліся і пачалі з задавальненнем карыстацца яго магчымасцямі. Гэта прыклад таго, як мерапрыемствы можна рабіць іначай, і ён паказвае, які вялікі патэнцыял і энергетыка раскрываюцца, калі кожны ўдзельнік можа заявіцца са сваёй ідэяй і вызначыць праграму мерапрыемства”.

Veranika Bebekh presenting her topic
Вераніка Бебех прэзентуе сваю тэму

Сапраўды, удзельнікі (не) канферэнцыі прапанавалі амаль 20 сваіх тэмаў. А далей галасаванне вызначыла самыя запатрабаваныя. Самай папулярнай стала тэма Веранікі Бебех, настаўніцы англійскай мовы з СШ №4 г. Салігорска “Выкарыстанне мабільных тэлефонаў на занятках”. Іншыя прэзентацыі, звязаныя з новымі тэхналогіямі і мультымедыя, таксама апынуліся ў топе.

Замежныя педагогі з Чэхіі і Украіны таксама прынялі ўдзел у Эдкэмпе. Іржы Трунда, дырэктар адной з агульнаадукацыйных школ Чэхіі і адначасова супрацоўнік Педагагічнага факультэта Карлавага ўніверсітэта ў Празе, падзяліўся з беларускімі ўдзельнікамі метадамі ацэнкі прагрэсу рэформ у адукацыйнай сферы на прыкладзе Чэхіі. Іржы таксама расказаў, якой сістэму школьнай адукацыі хочуць бачыць у Чэхіі праз 10 гадоў. Па ягоных словах, найважнейшае дасягненне чэшскай адукацыйнай рэформы – дэцэнтралізацыя адукацыі.

Іржы Трунда: “Нашыя школы маюць вялікую ступень свабоды: мы можам складаць свае адукацыйныя планы і праграмы, іх не спускае нам зверху ўрад. Больш за тое, школы не проста могуць, але і павінны гэта рабіць. Усе настаўнікі ўдзельнічаюць у абмеркаванні, як наладзіць навучальны працэс і ўзаемадзеянне з вучнямі, гэта не бярэцца з ніадкуль. Вядома, ёсць некаторыя агульныя рамкі, але дапускаецца вялікая ступень свабоды. У нас ёсць выбар з розных падручнікаў па кожным прадмеце любога года навучання. Больш за тое, школа можа выдаць і ўласны падручнік”.

edcamp7
Яўген Пугач на адкрыцці Эдкэмпа

Выданне ўласных падручнікаў, вядома, вымагае грошай. Але чэшскія школы карыстаюцца грашовымі сродкамі з мясцовых бюджэтаў, а таксама ад сваёй камерцыйнай дзейнасці, напрыклад, арэнды класаў альбо спартыўных залаў.

Яўген Пугач з супольнасці Global Shapers Minsk Hub, якая прывяла ініцыятыву Эдкэмп у Беларусь, мае намер развіваць поспех новага фармату: “Пабачыўшы цікавасць і актыўнасць настаўнікаў, я пераканаўся, што такі фармат запатрабаваны і павінен і далей развівацца ў Беларусі. Мы разлічваем, што ўжо ў пачатку наступнага года зможам арганізаваць яшчэ больш маштабны, масавы і працяглы (двухдзённы) Эдкэмп”.

У планах арганізатараў – вывесці Эдкэмп у рэгіёны краіны і правесці шэраг міні-эдкэмпаў у беларускіх школах.

Здымкі: Людміла Батура.